કેરળ: હિંદુ-મુસ્લિમ વોટ્સએપ ગ્રુપ બનાવવાના મામલે બે IAS અધિકારીઓ સસ્પેન્ડ, સરકાર દ્વારા કડક કાર્યવાહી !

કેરળના ઉદ્યોગ અને વાણિજ્ય નિર્દેશક કે. ગોપાલકૃષ્ણને પોલીસમાં ફરિયાદ નોંધાવી હતી કે તેમનો મોબાઇલ હેક કરી લેવામાં આવ્યો હતો અને તેનું ઉપયોગ વોટ્સએપ ગ્રુપ બનાવવા માટે કરવામાં આવ્યો હતો. તે છતાં, રાજ્ય સરકારે હવે તેમને સસ્પેન્ડ કરી દીધા છે.

કેરળમાં IAS અધિકારીના મોબાઇલ નંબરથી એક સમુદાયના અધિકારીઓ માટે બનાવાયેલા વોટ્સએપ ગ્રુપના મામલે વિવાદ હજુ થમ્યો નથી. હવે રાજ્ય સરકારે મોટી કાર્યવાહી કરતા સોમવારે બે IAS અધિકારીઓને સસ્પેન્ડ કર્યા છે।

કયા અધિકારીઓ પર થઈ કાર્યવાહી?

કેરળના ઉદ્યોગ અને વાણિજ્ય નિર્દેશક કે. ગોપાલકૃષ્ણને પોલીસમાં ફરિયાદ નોંધાવી હતી કે, તેમનો મોબાઇલ હેક કરી લેવામાં આવ્યો હતો અને તેનો ઉપયોગ ‘મલ્લુ હિંદુ ઓફિસર્સ’ નામના વોટ્સએપ ગ્રુપ બનાવવા માટે થયો હતો. જોકે, તપાસ બાદ રાજ્ય સરકારે હવે તેમને સસ્પેન્ડ કરી દીધા છે.

ત્યારબાદ, કૃષિ વિભાગના વિશેષ સચિવ એન. પ્રશાંતને પણ પછલા ત્રણ દિવસોમાં સોશિયલ મીડિયા પર અન્ય IAS અધિકારી અને અતિરિક્ત મુખ્ય સચિવ એ. જયતિલક વિરુદ્ધ અનેક પોસ્ટ્સ કરીને વિવાદ સર્જવા માટે સસ્પેન્ડ કરવામાં આવ્યા છે.

શારદા મુરલીધરનની રિપોર્ટના આધારે કાર્યવાહી

તાજેતરમાં વિવાદોમાં રહેલા બે IAS અધિકારીઓ સામે કેરળ સરકારે સખત પગલું ભર્યું છે. મુખ્ય પ્રધાન પિનરઈ વિજયને મુખ્ય સચિવ શારદા મુરલીધરનની રિપોર્ટના આધારે સોમવારે બંને અધિકારીઓને સસ્પેન્ડ કરવાનો નિર્ણય લીધો. આ અગાઉ, રાજસ્વ મંત્રી કે. રાજને જણાવ્યું હતું કે સરકાર અધિકારીઓને પોતાની મનમરજી પ્રમાણે કામ કરવાની મંજૂરી નહીં આપે અને તેમને નિયમો અને પ્રક્રીયાઓના આધારે જ કામ કરવું પડશે.

કયા છે આરોપ?

માહિતી મુજબ, ગોપાલકૃષ્ણન દ્વારા જ ‘મલ્લુ હિંદુ ઓફિસર્સ’ નામનો વોટ્સએપ ગ્રુપ બનાવાયો હતો. જોકે, તેમણે પોલીસમાં ફરિયાદ નોંધાવી હતી કે તેમનો ફોન હેક કરી લીધો હતો અને આ ગ્રુપ તેમની જાણ બહાર બનાવવામાં આવ્યો. બીજી તરફ, એન. પ્રશાંત પર આરોપ છે કે તેમણે સોશિયલ મીડિયામાં અતિરિક્ત મુખ્ય સચિવ એ. જયતિલકને ટાર્ગેટ બનાવ્યા અને અન્ય ઘણા અધિકારીઓને કરિયર બરબાદ કરવાની ધમકી આપી. મુખ્ય સચિવ શારદા મુરલીધરે આ મામલે તેમની હરકતોની જાણ મુખ્ય પ્રધાનને કરી હતી.

પોલીસના દાવા

પોલીસની તપાસ મુજબ, ગોપાલકૃષ્ણને ફક્ત ‘મલ્લુ હિંદુ ઓફિસર્સ’ જ નહીં, પરંતુ ‘મલ્લુ મુસ્લિમ ઓફિસર્સ’ નામના વોટ્સએપ ગ્રુપ પણ બનાવ્યા હતા. પોલીસને તેમની હેકિંગની દલીલ સાચી ના લાગી અને તેમના પર ખોટી ફરિયાદ નોંધાવવાનો અને પુરાવા સાથે છેડછાડ કરવાનો આરોપ છે. શનિવારે કેરળ પોલીસે દાવો કર્યો કે જે ફોનમાંથી વોટ્સએપ એકાઉન્ટનો ઉપયોગ કરીને ધર્મ આધારિત ગ્રુપ બનાવવામાં આવ્યા હતા, તે ફોનને સંપૂર્ણપણે રીસેટ કરવામાં આવ્યો હતો. આ કારણે ફોરેન્સિક તપાસમાં ફોન હેક થવાનો કોઈ પુરાવો મળી શક્યો ન હતો.

ફોન હેક થયેલો ન હતો

પોલીસના જણાવ્યા અનુસાર, અનેક રિપોર્ટમાં આ દાવો કરવામાં આવ્યો કે ગોપાલકૃષ્ણનનો ફોન હેક થયો ન હતો. જોકે, ત્રિવેન્દ્રમ શહેરના પોલીસ કમિશનર સ્પર્ઝન કુમારે જણાવ્યું હતું કે, ડિવાઇસ સાથે છેડછાડ કરાઈ છે કે નહીં તે હજી સ્પષ્ટ નથી, કારણ કે તેને રીસેટ કરી દેવામાં આવ્યો છે. તેમણે આ મામલે રિપોર્ટ રાજ્યના પોલીસ વડા શેખ દરવેશ સાહેબને મોકલી આપી છે.

ડીજીપી કચેરીએ જણાવ્યું કે રિપોર્ટ ગુપ્ત છે અને તેને રાજ્ય સરકારને મોકલી આપવામાં આવશે. પોલીસ દ્વારા IAS અધિકારીની ફરિયાદ બાદ આ કેસની તપાસ કરવામાં આવી, જેમાં આક્ષેપ હતો કે તેમના વ્યક્તિગત વોટ્સએપ નંબરને હેક કરીને તેનો ઉપયોગ ધાર્મિક ગ્રુપ બનાવવા માટે કરવામાં આવ્યો હતો, જેમાં વિવિધ સમુદાયોના અધિકારીઓને જોડવામાં આવ્યા હતા અને આ ગ્રુપને ‘હિંદુ સમુદાય ગ્રુપ’ તરીકે રજૂ કરવામાં આવ્યું. અધિકારીએ ફરિયાદ નોંધાવતાં જ આ ગ્રુપને નિષ્ક્રિય કરી દીધું.